Näbst de Biuder u Erläbnis git's ja uf Reise immer no ganz öppis angers Wichtigs: D'Lüt, wo mä trifft!
D Brenda isch am Iigang va de National Historic Site in Port Royal tätig. Us Zittvertrieb chnüpft si näbebii wunderschöni Armbänder.
De Pierre het nis in Port Royal mit vüu Passion u Humor a Hufe interessanti Fakte zu de Vergangehiit verzöüt.
D Eveline Dubé isch a sehr sympathischi Frou va Saint Andrews u macht wunderschöni „Ocean Boards“. Si het‘s fasch nid chene gluube u mega Früüd ghääbe, dass mer as Foto mit iira zäme möchte mache🤗.
Ungerwägs lehre mr d'Helen u dr Dann us Ontario kenne. Sie si jewils rund 7 Mt. pro Jahr mit ihrem Truck Camper ungerwägs u o viu uf Kanutoure im Yukon u de Nortwest Territories. Mit ihne vrbringe mr ä gmüetleche u zfriedne Abe am Füür.
Dr Pierre füehrt in Petit-Rocher ä chlyne Campground. Ä herrleche u witzige Typ😂. Mir dörfe de praktisch vor sim Huus diräkt am Meer üses Camperli häresteue u hei besti Sicht uf ds Meer (u är nümm für die Nacht...). U am Morge teilt är no siner orange Tomäteli mit üs.
D'Ginette empfaht üs im Visitorcentre vo dr Provinz New Brunswick sehr härzlech.
D'Michèle isch 63i, sitemne Jahr pensioniert u wohnt uf dr Île d'Orléans - NID ir Garage😂! Diese Summer isch sie mitere Kollegin 8 Wuchä in Newfoundland ungerwägs gsi, wo mr se hei lehre kenne.
D Véronique isch üsa Captain ufum Waubeobachtigs-Boot z Tadoussac gsi. A Hammerfrou!
D Sylviane u de Serge si as härzlichs Paar us de Wäütsch-Schwiz, wammer in Godbout keneglehrt hii. Si hii nis vorum Gmindsbüro, wammer de Campingplatz si ga zahle, aagsproche (wäge de zwe chliine Chlääbere am Alkove hii si gwüsst, dass mer Schwizer si). Si si wahri Weltenbummler u hii mittemene MAN-Camion di ganzi Wäüt bereist. Hie si si mittemene Truckcamper underwägs.
D'Denise schaffet bim Port Sept-Îles u vrzeut üs sehr usfüehrlech u liebevou vom Abetüür vor Mylène, wo solo im Ruederboot dr Atlantik überquert het.
D'Annie isch Künstlerin u betriebt äs Atelier in Bay Trinité. Sie malt Biuder u macht o hübschi Sache us Ton, wie z.B. die zwei luschtige Wale für a d'Wand.
Dr Kevin u d'Marianne (Brüetsch u Schwoscht) schaffe beidi aus Guide bi Manic 5 u füehre üs spannend u mit viu Humor dür das Chraftwärch.
D'Kaya schaffet mit Passion im Gateway to Labrador in Labrador City.
Dr Jason vo Home Hardware in Happy Valley-Goose Bay füllt dr Gastank vo üsem Camper wie dr Blitz!
D'Chelsea u dr Chris nähme üs uf ne sensationelle Usflug mit ihrem Boot mit!
In Woody Point lehre mr d'Connie kenne. Sie schaffet im "the Merchant", emene urchige Pub am Wasser. Connie & Conny hinger dr Theke 😊
Dr Tony King isch ä wunderbare Maa u nimmt üs mit uf ne unvrgässlechi Bootstour u ne Fahrt dür ds Dorf mitem Outo.
Mir si dert näbem Camper ä Glace am Schnouse, fahrt dr Sterling zuche, stiegt us u faht afa schnure (u bliebt de sicher o angerhaub Stung😊). Är isch 66i, pensioniert (het aube ir Fischfabrik in Fogo gschaffet u het Krabbe gchochet - nei, är heig nid gärn Krabbe!) u isch i dr freiwillige Fürwehr. Diese Früehlig hei sie vor Fürwehr us chli ä spezielle Uftrag gha: Mitem Tribiisch isch ä Iischbär nach Fogo Island cho (är isch sim Fueter, de Robbe, gfougt) u geng nöcher zum Dorf cho. So hei sie ne betöibt u d'Fürwehr het bim Vrlad ufe Truck müesse häufe. Läck, heige die glost, wo sie ä Truck bsteut hei, füre Transport vom Iischbär zrügg nach Labrador. Das sigi sines Wüssens übrigens o ds erste Mau gsi, wo d'Fähre ä Iischbär transportiert heigi. U dr eint, wo heigi ghulfe, dr Bär i d'Transportchischte inez'zieh u nähr heigi müesse übere haubschlafend Bär chlättere, heig fasch ä Härzinfarkt übercho, wo dä unger ihm gruurret heigi)😂!
Dr Roy isch zueständig im Brimstone Head RV Park. Uf d'Frag, öb är dr Roy sigi, antwortet är nume: On good days, I'm Roy Goodday, on bad days, Roy Badday 😊
Dr Jason isch Profifotograf us North Carolina u vrbringt dr Summer in Newfoundland u dr Winter in Maine, USA (wüuer dr Schnee vrmisst). Äs git für ihn kener schlächte Tage... Är bsuecht au Tag d'Puffin Kolonie u schiesst brilianti Fotos vo ihne.
D'Margaret het üs ä Brattig vo Informatione übere Lüchtturm am Cape Bonavista parat. Sehr charmant, üsserst spannend u mitere Priise Humor.
Dr Glenn isch Chäuner im Artisan Inn in Trinity. Ufmerksam u glich zrügghautend, geng ä Spruch parat u glich professionell. I zwe Monet wirder pensioniert, all the best!
Danielle: ä Ängu im Check-In vomene Campground, wo üs mit Tips u Stadtplan u unzählige nützleche Informatione über St. John's vrsorget, eifach herrlech😊!
U d'Johanna erklärt üs liebevou u usfüehrlech üses Gfährt.
Dr Howard het üs mitem Shuttle abghout bim Hotel. Är isch früecher bi üs, aus abgmacht (zersch heimerne drwäge fürne Schwizer ghaute😂), drum fahrter mit üs "the scenic route" zum Campervrmieter.
Dr Greg, är schaffet für Parks Canada bir Zitadelle vo Halifax u zeigt üs mit viu Passion dr bescht Spot für Fotos vom 12i-Schuss:
Dr Jeff isch Barkeeper in Halifax u die gueti Seel für die gstrandete Evakuierte vom Waldbrand; u o für üs.
D'Julie, het früecher ir Pfleg gschaffet, itz im Service im Hotel u umsorgt üs bim Zmorge.
