Bonjour Québec – la Côte-Nord, ds Nordufer vom St. Lorenz Strom

Nachdäm mr uf rund 1’700km Labrador (viumeh Strasse git’s übrigens o gar nid…) u ä Teil vo Québec dürquert hei, lande mr am 5. Ougste wieder am Meer, nämlech in Baie-Comeau am St. Lorenz Strom i dr Provinz Québec.

Québec isch mit über 1'600’000km2 über 40x grösser aus die ganzi Schwiz u het ungefähr glichviu Iiwohner. Guet, die si natürlech nid so schön uf die ganzi Flächi vrteilt u sammle sech zu ganz grosse Teile entlang em St. Lorenz Strom. Aber glich, rund 2’000km vom Nord- zum Süd- u rund 1’500km vom West- zum Oständi si scho no stouz… Mir nähme de ds Nordufer vom St. Lorenz Strom unger d’Räder, wei ostwärts bis zum Ändi vor Route 138 fahre. In Sept-Îles mache mr afe Haut u gniesse ä sunnige Tag am Meer. Ja, o bi üs isch dr Summer chli zrügg😎.

Was mir nid wüsse: Hie isch o ds Ruederboot «Hermel» usgsteut, wo d’Mylène Paquette drmit im Jahr 2013 i 129 Tag solo vo Halifax us nach Frankriich gruederet isch (https://www.mylenepaquette.com). Unwüssend wärde mr vor Denise (sh. people, we met) uf sehr liebevoui Art mit Infos u Fiumsequänze etc. regurächt überschwemmt. Ä spannendi Story u ä tolli Begägnig😊!

 D’Strecki zieht sech über rund 650km meh oder weniger aus dr Küste entlang. Wunderschön! Obwohl Meer, rede hie aui vo «Le Fleuve» oder em «Saint Laurent». Zwar isch hie scho lang nümme Strom oder Fluss sondern viumeh ds Delta vo däm mächtige Fluss.

Ungerwägs, in Baie-Johan-Beetz, träffe mr uf ne ganzi Familie Inukshuk😊

Lut Charte u Reisefüehrer isch d’Strass bis Natashquan teeret, die wytere 44km nach Kegaska göngs uf Gravel. Ds Biud vor Ort seit auerdings öppis angers, auso lege mr los, das lö mr üs nid la entgah, we mr scho mau hie si😊. Die früsch teereti Strass isch wunderbar z’befahre! Nach rund 27km lauere mr de auerdings in «die Mutter aller Baustellen» ine! Momou, Strasse boue chöi sie hie scho!! U dr Vrchehr rollt drzue o no…

U Maschine hei sie, äs isch ä Fröid. Oder het öpper scho mau so ä geile Truck mit Renn-Streife gseh..?

In Kegaska isch de fertig; nid nume mittem Teer, nei, d’Route 138 hört hie. Ab hie gäng’s wyter mitemne Fährschiff, entlang vo öppe 375km Küstelinie, bis de ganz im Oste in Vieux-Fort wieder ä Strass chunnt. U ja, dr ufmerksam Läser merkt sofort, dass mir ja Ändi Juli bereits vo Blanc Sablon us uf däm churze Stück bis a ds Ändi si ungerwägs gsi😊. Wär weiss, wie lang's duuret, bis evtl. ä Strass entlang dr ganze Küste fertiggsteut wird..?

Nach über 2 Monet im eher dünn besiedlete Newfoundland u Labrador isch dr Entscheid, zersch gemächlech no chli dr Côte-Nord z’fouge gar nid so schlächt. Richtig Weste, gäge Tadoussac u Ville de Québec, wird’s sehr touristisch u beläbt, da füehle mr üs hie no chli i dr soziale Dekompressions-Chammere u chöi i chlyne Schritte dr «Zivilisation» entgäge😊. Ungerwägs finge mr o geng wiedermau ä hübsche Platz, wo chli wäg vom Rummel isch, zum nächtige.

Bim Chute Manitou mache mr Haut u loufe am glychnamige Fluss entlang bis unger a Wasserfau. Momou, dä bringt scho no grad chli Wasser über die 35m höchi Stufe, bevorer churzdrufabe im Meer (pardon, im «Fleuve»😊) mündet.

Mir stüüre langsam dr Zivilisation zue.

Z Cap de Bon-Désir köört zu Parks Canada u isch sehr bekannt defüür, dass mu vam Ufer uus Wale chan beobachte. Wier hii de o etlichi Belugas erspäht; z Meer isch zümlich ruig gsi u dermit het mu di wisse Rügge va däne iidrückliche Tier guet gseh.

As lääbe hie zwüsche 1‘000 bis 2‘000 va dene Tier; si erinnere mier ging a we a Delphine, wüw si a ähnlich lieba Usdruck im Gsicht hii u o so neugierig sin. Leider isch iines Aazau im St.-Lorenzstrom am Sinke u si kööre hie mittlerwile zu de gfährdete Tierarte. Darum si o entsprächendi Schutzgebiet iigrichteti cho. Am Taag druff simmer uf Tadoussac cho - wi de Simi scho beschrübbe het, isch das a sehr hübscha u sehr touristisch-prägta Ort. 

Zum Glück hiimer zitt Neufundland u Labrador (mit de Riis am St.-Lorenz-Strom entlang, va Baie comeau bis uf Kegaska u ummi zrugg) gnue Zitt ghääbe, üüs ummi a meh Mensche, Outo, Hüüser u Lärm z gwöhne; Tadoussac isch z Waubeobachtigsmekka schlechthin u jeda Tourischt, wa Québec bereist, schinnt hie verbiizcho. D Aazau va Lütt isch nis a Moment lang gliichwou schier erdrückend vorcho; da hüüft nume?: D Flucht i di nächschti Microbrasserie😃. As gitt hie, wi o z Neufundland u z Labrador, etlichi va däne Brasserie u z Pier isch sehr lecker (wier hii beidi am Liebschte IPA; hie hiimer zudäm z NEIPA entdeckt, z New-England-IPA, wammer o sehr fein füne). (Z Neufundland u z Labrador gittes näbscht guetem Bier o feina Wii z chuufe, dasi hani so nid erwartet; im Gägezuug hani nid teicht, dasses z Québec näbe feinem Wii u knusprigem Brot o feins Bier gitt🤗).

Hindernah simmer i z CIMM, z Centre d‘interprétation des mamifères marines. I däm Museum si etlichi Skelett va verschidene Wale usgstöüt u unzähligi Detailinformatione, wi zum Bispüü zum Frässverhaute u de Jagdtaktike, chä uf modärni u underhautsami Art u o mittus Videos vermittlet - sehr ufschlussriich; endlich hani kapiert, wi das mit däne Barte würklich u i de Praxis funktioniert😅. 

Nai hiimer üüs de ultimativi Fraag müesse stöle: Wiimer a Waubeobachtigsfahrt mache oder niid? De ökologisch Impact liggt, egau wöles Boot mu nümmt, uf de Hann; darum giites um d Grundsatzfraag, öb mu sona Fahrt überhoupt mittum Gwüsse chan veriibare oder niid. Wier hii mit nis grunge, nis schlussendlich defüür entschidde u di hoffentlich ökologisch verträglichschti Varianta usgwäüt. Wier si de o entsprächend usgstatteti cho😃: 

Üsa Captain isch d Véronique gsi - a Hammerfrou (siehe „People, we met“). Mit iira hiimer a absolut unbeschriiblich schööna Namittag erläbbt. A Frou, wa ziit 40 Jahr jeda Summer hie verbringt u im Zodiac näbe mier gsässe isch, het mer gsiit, dass si das no nie erläbbt hiigi u das würklich einzigartigs Glück sigi; soooo vüu Tier um üüs um, bi notabene wunderbarschtem Wätter u absolut ruigum Meer. Bref, hie as paar Highlights devah: 

D Ranger überwache - hie o under de wachsame Uuge vamene Seehunn😅 - wüvuu Schüff bü de Wale underwägs sin u dass d Vorgabe, wi nooch mu a di Tier härefahrt, iighaute chä. 

Bim Zruggfahre hiimer de no a Schuu Seehünn gseh (Grey seals). Das het dä einmalig Namitaag no einzigartiger gmacht. 

Va hie fahremer moor gäge d Ville de Québec wittersch; on verra bien, was nis dettena erwartet😃.