Welcome to Newfoundland!
Am 1. Juni isches sowit, mir übernähme üse Camper. Wo üs die schier unzählige Dokumänt zur Ungerschrift vorgleit wärde, heimer bau ds Gfüeuh, mir heig üs im Vrgäss fürne Hypothek entschiede… Aber d’Marie vrsicheret üs, äs heigi aues sini Richtigkeit. So übernähme mr für die nächste vier Monet üse treu Begleiter.
Nähr heisst’s afe: Iichoufe!
Zum Znacht git’s de Salat mit grüene Spargle u Jakobsmuschle; aus der Region, für die Region!
Ufem Wäg quer dür Nova Scotia gseh mr no viune Orte, wie dr Hurrican Fiona letschte Herbst gwüetet het.
Pünktlech checke mr uf dr Fähre MS Highlanders nach Newfoundland ii u chöme nach guet 7h Fahrt (u 1/2h Zytumstellig; wiukomme in Newfoundland-Time) uf dr Insle a. Itz startet üsi Tour z’Grächtem!
Ar Westküste heimer scho die erste Wiudtierbegägnige; vom Ufer us!
Was no fäuht, si d’Landtier… Ume si sie aber scho…
Offebar isch d’Natur hie das Jahr no paar Wuchä hingerdri. Schiinbar sigi itz sehr lang ds Wätter vom Norde här cho u heigi für chauti Tämperature gsorget. Drum isch itz dr Frühelig o ersch so richtig im Gang. No wäg de Tämperature: Am Tag vom Grossiichouf heimer sagehafti 32C gha, itz hocke mr bi knapp 10C in Twillingate…
Churz vorem Abstächer a d’Nordostküste bi Twillingate stöh mr scho vor de erste Iischbitze, wo’s i ne Bucht gspüehlt het! Wow…
U in Twillingate säuber warte de die grössere Kaliber uf üs…
