Dr Süde vo Nova Scotia

Nachem Abgäh vom Camper übernähme mr am Flughafe vo Halifax ä Mietwage u hei no ä Wuchä im Süde vo Nova Scotia vor üs.

Mir fahre i d’Stadt u gö dert mini liebe Eutere ga abhole, wo vor paar Tag scho hie häregreiset si. So fahre mr stilächt bim Hotel vor😜

Ir Nöchi vo Lunenburg heimer ä Cottage amene See im Waud gmietet, wo mr chli üser Erläbnis chöi la setze u glichzytig mit ihne no paar Tagesusflüg ungernäh.

Ds erste wysse Truffe (Schwizer Schoggi usem Migros😋) nach 4 Monet – mmmmmh!!

Am 2. Septämber 1998 isch d’SR 111 ir Nöchi vo Peggys Cove i ds Meer gstürzt, nachdäm ä Kabelbrand ir Bordelektronik zu Rouch im Flüger gfüehrt het. A zwene Syte ir Bucht vor Peggys Cove si zwöi Memorials zum Gedänke a dä schwarz Tag ir Luftfahrt errichtet. Mir bsueche die beidi.

Bi schönem Herbstwätter bsueche mr dr Kejimkujik National Park, wo im Momänt i schönste Farbe lüchtet.

Uf dr einte Wanderig stoglet d’Conny quasi no über ne Strumpfbandnattere😂

In Lunenburg liegt d’Bluenose II im Hafe. Das Schiff isch ä Nachbou vor Bluenose, wo 1921 in Lunenburg aus Fischersäguboot vom Stapel gloffe isch. Gli het mä gmerkt, dass das Schiff mit 386m2 Säguflächi ussergwöhnlech schnäu isch. D’Teilnahm am alljährleche Fisherman’s Cup het de das o bestätiget: 17 Mal in Foug het d’Bluenose die Trophy gwunne! Das Schiff isch sit denn sehr wichtig für ganz Canada u natürlech d’Provinz Nova Scotia. Unger angerem isches uf em 10-Cent-Stück u em Outonummero vo Nova Scotia. Nachdäm d’Bluenose 1946 vor Haiti gsunke isch, het mä 1963 d’Bluenose II nacheboue u ehrt drmit das gschichtsträchtige Schiff.

Lunenburg isch äs farbigs u hübsches Städtli.

Die Anglikanischi Chiuche isch 1753 boue u nachemne tragische Brand vo 2001 wieder neu ufboue worde.

Blue Rocks, äs hübsches Fischerdörfli.

In Annapolis Royal bsueche mr d’Port Royal National Historic Site. Das isch ä Handelsposte, wo die erste französische Siedler hie boue hei, um mit de hiesige Indianer z’gschäfte. Das isch auso quasi die ersti Houptstadt in Neufrankriich gsi…

Im Süde vo Nova Scotia isch dr Kejimkujik Seaside National Park.