Iceberg Alley – jetzt taut‘s!

Vo Bonavista us fahre mr wyter dür hübschi Fischerdörfli mit farbige Hüsli u farbefrohe Boot, wo sech am Ufer Hummerfalle u ab und zue i re Bucht o Iischbärge staple. Logisch, bi Sunneschiin fägt aues meh – s’isch haut immer schön, wenn’s schön isch😊 

Ja, ds Wätter isch itz nid nume schöner, äs isch praktisch über Nacht o fasch 20C wärmer worde. Düre Tag schneue d’Tämperature jedefaus uf über 30C! U a windige Plätz lö üs o d’Moskitos u Blackflies in Rueh😊. In Lumsden lauere mr de a ne richtig schöne Sandstrand (guet, nid wyt usse triebe Iischbärge, was ds Meer de glich nid richtig bebadbar macht…). Äs erinneret fasch chli a d’Nordsee. 

O d’Vegetation u d’Blueme profitiere vor Wärmi. 

In Farewell nähme mr d’Fähri, mir wei Fogo Island bsueche. Zur Grössi oder Höchi vo üsem Camperli müesse mr üs keiner Sorge mache😊. 

Hie gö mr am Meer ga loufe u gniesse paar schöni Summertage. 

Mir finge de o geng äs hübsches u ruehigs Plätzli zum übernachte – Voumond inklusive. 

Uf Fogo Island, in Joe Batt’s Arm, isch u.a. o d’Zita Cobb ufgwachse. Sie het d’Insle vrlah, aus Investment Bankerin richtig viu Gäud vrdient u das wott sie am Ort vo Ihrer Chindheit investiere u d’Bevölkerig drvo la profitiere. So het sie d’Multimillione Stiftig Shorefast Foundation gründet, wo lokals Kunsthandwärk ungerstützt, ä Bibliothek mit landeskundlicher Literatur errichtet het u o ds Fogo Island Inn betriebt. Das isch ä 5-Stärn-Schuppe, wo sehr uf Nachhaltigkeit us isch u äs sozial-ökologischs Konzept het. So si z.B. d’Möbel i de Zimmer uf dr Insle gmacht worde, äs wird mit hiesige Sache gchochet u mitem Gwinn wärde d’Fischerdörfer uf Fogo Island wirtschaftlech ungerstützt. Mir vrzichte auerdings uf ne Bsuech, d’Nacht chostet pro Zimmer gäge $1'000.- u dr Mindestufenthaut si 3 Nächt… Aber dr Bou het glich chli öppis – irgendwie schaurigschön (u mir si nid ganz schlüssig, öber härepasst oder nid)…

Achtung: ab hie Seisler 😊!! 

O hie gseht mu überau di farbige Hüüseni, wa de Ortschafte o bi schlächtem Wätter a liebliecha, weicha Touch verleihe. U ja, Urs, du hesch Rächt, di Hüüseni erinnere starch a Skandinavie. Wemu d Lütt köört rede, de wähnt mu sich am Eheschte z Irland (z Nova Scotia unena ender z Schottland); uf au Fäü muess mu sich, o wemu gar nid soooo schlächt Englisch chan, zümlich aastrenge, d Lütt z verstah😅, zumau si iines Englisch über d Jahrhundert natürlich mit typische Usdrück u Redenswiise aagriicheret hii, wanes nume hie gitt. (Zum Bispüü: "Where y' longs to?" = "Where are you from?"; "Stay where you're to 'til I comes where you're at." = "Stay where you are until I get there.") Dass dezue no Ortsnäme, wi zum Bispüü „Seldom“ existiere, macht de Struus a Müglichkiite va luschtige Missverständnis umso grösser. 

A Hufe Lütt hii iines Wohnsitz hie u lääbe o no vam Fische u de Meeresfrücht; wier träffe Fischer, wa grad z Tagwärch voubracht hii u zrugg i Hafe fahre. Um d Fischerboot um gseht mu o hie, wi anderschwahr, ging a Schwarm Möve - d Opportunischte va de Wasservoguwäüt. 

De Frou, wammer hie aatroffe hii, hiimer spontan zu iiras hübschem Huus gratuliert. Si het nis verzöüt, dass das iiras „Summer Home“ isch u si z Jahruus z Corner Brook im Weschte wohnt. 

Im Brimstone Head Park in Fogo fünemer as Plätzli für z Übernachte, luufe ufe Brimstone Head wuchi, gniesse di ungloublich schööni Ussicht uf z Meer u d Iischbärge, wa vor de Bucht dümple. Znacht ässe mer de dussena am Tüschli, wa z Nüfundland uf jedem einzelne Zäütplatz iis dezueköört, bi schönschtem Suneschinn, as aagnähms Lüftli giit, mit Blick uf d Bucht u d Iischbärge - was wott mu meh? 

Wier näme d Fähra va Fogo zrugg uf Farewell u fahre uf Twillingate (wammer ja am Achazfahre scho verbii cho sin) i d Sleepy Cove, ganz i de Nööchi vam Lüüchtturm, wammer ufmene ehemalige Campingplatz as prima Plätzli für z Übernachte hii. Mittlerwile si ganz a Huufe Iischbärge z Twillingate - wa ja bekannt defüür isch, d „Iceberg Capital of the World“ z sii (o de Iischbärg, wa z Schicksau va de Titanic besiglet het, söü hie verbiicho sii) - aacho u o hie hiimer diräkta Blick druff. 

Iina bricht vor üsne Uuge mit mächtigem Getöse usenann, treit sich infolgedesse / kippet umm - as sehr beiidruckends Schouspüü. 

Speeter am Abe, wammer dinena sin, chlopfet plötzlich a Frou a üsi offeni Campertüür u fraggt: „Would you like a piece of iceberg?“. (Bitte wassss?!?). Si verzöüt, as hiigi z Twillingate voor as grooses Stücki a d Beach gspüüt u sia u iiras Ma vertiili das jitz. Wahnsinn🤗💖! Jitz begleitet üüs auso as Stücki Iischbärg im Tiefchüeler😅😋😎 (as Glück, isch de Frigo nach nordamerikanische Verhäütnis dismensionierta😉).