Im Nebel von Avalon...

Dä Tegscht hie isch in Seislertütsch verfasst - auso bitte, zwecks besseren Verständnisses, z Sprachzentrum im Hürni entsprächend umstöle oder, im Falle eines Falles, lutt lääse (a Bärner Kollegin het mer mau gsiit, si stöli sich jewils mier voor, wini de jewilig Tegscht vorlääsi, de gangenes am Böschte😃).

Nach vierne Nächt z St. John‘s fahremer hütt wittersch zum Cape Spear - am öschtlischte Fläck va Nordamerika - u sim bekannte Lüüchtturm. Beidi Orte si uf de Avalon Haubinsu. Bis churz voras mer a de Küscht aachäme, isch sehr schöös Wätter gsi - a Woutat nach etliche Rään- u verhangene Taage. „Die Nebel von Avalon“ (mögeter nuch a dä Füüm bsüne?) hiimer nai allerdings live erläbbt😃; a de Küschta simmer i Näbu gfahre, wa di ganzi Kulisse i mystisches Liecht toucht het.

De Lüchtturm va Cape Spear bestiit usmene schööne Houzhuus, wa i de Mitti a Stiiturm het. Im 1955 isch dernäbe a Betonturm buut u d Liechtinstallation vam Lüchtturm i dä nü Betonturm zügleti cho.

Wüw mer gwüsst hii, dass z St. John‘s ja schöö Wätter isch, simmer hindernah zrugg Richtung Norde gfahre. U präzis - chumm hiimer d Küschta verlah, isch ummi z schööscht Wätter gsi. Wier hii bü de Middle Cove Beach stüüghääbe u si am Strand ga luufe; as isch ki Sandstrand, sondern iina mit chliinum u groosum Grien; si sääge däm hie „Pebbles“ (ja, wi de Name va de Chliini bü de „Familie Feuerstein“😉).

Am Abe hiimer bü de Pouch Cove a wunderbara Park- u Übernachtigsplatz näbera Hunde-Trainings-Matta gfune. A Ma isch dettena mit sine zweene Hünn am Trainiere gsi u zuenis cho rede; d Lütt hie si ungloublich fründlich (ma siit, as sigi di fründlichschte Kanadier). Är het de o va sich uus gsiit, är hiigi hie o scho Camper gseh d Nacht verbringe, wier hiigi hie sicher üsa Früdde. Bim Apero hiimer de no amene Iischbärg chene zuegugge. 

Hütt fahremer vam rächte, nördliche Arm va de Avalon Peninsula i Weschte a d Conception Bay, bis zum La Manche Provinical Park; as räänet u het Näbu. 

De Hümu isch zwar o hütt ummi verhange, as stiit aber ganz eppis Wunderbarsch ufum Programm - wier fahre a we zrugg, uf Bay Bulls, zu Gatherall‘s Puffin and Whale Watch. Hie büni im 2014 o häre, denn hii si aber saisonbedingt scho zue ghääbe. Wier mache a Bootstour usi zu de Puffins / Papageietoucher. Erfreulicherwiis gseh mer ganz a Huufe va dene luschtige Kärleni u o zwe Minkwale. 

De Captain u d Crew gäbe autz; bim Usifahre, beziehigswiis Ichifahre i d Bucht luuft iirischi Musig, wa ganz a ergriifendi Stümig laht lasse ufcho (us Landratta gspürrt mu dermit plötzlich d Liebi u d Passion va däne Lütt, für z Meer u für z Usifahre mittum Schüff, egau bü welem Wätter), d Guides verzöle a Hufe interessanti Fakte u o Luschtigs (si lah d Gescht zum Bispüü lasse raate, wi d Gull Island, wammer härefahre, bü de Iiheimische o no hiist (as si dezue ganz poetischi Vorschleeg cho; d Lösig isch allerdings schlicht „Shit-Rock“ gsi😊, us visuell nachvouziehbare Grünn…) u am Schluss si füüf per Zuefausprinzip usgwäüti Passagiere zu Nüfundländer tüüpft cho. Defüür hii si drü Hürde müesse meischtere: Mitemene Fuess, inklusive Socke u Schueh, ina Chübu mit Meerwasser stah, z Füdle vamene nasse Plüsch-Puffin küsse u a Shot Schnaps exne; si si de für di garschtige Prüefige mittemne Zertifikat, wa si us Nöifundländer uswiist, usziichneti cho. Bref, as isch a herrlicha Trip gsi u het sich sehr glohnt.

Hindernah hiimer d Fahrt zum Cape Race ganz i Süüde vam rächte Arm va de Avalon Haubinsu under d Redleni gno. Am Vieri isch de du o d Suna no füra u wier hii di Fahrt umso meh gnosse; d Landschaft hie isch ifach uberwäütigend schön. Va Portugal Cove South uus isch d Straas zum Cape Race zersch no teereti u nai a Gravelroad, i aktuell wunderbarem Zuestann. Hie chüü mer diräkt näbum Lüüchtturm parkiere u o ubernachte; im Wüsse um di hoi Wahrschindlichkiit, dasses Näbu gitt, suechemer nis as Plätzli hindermene Wäümli, abgwandt vam Näbuhorn. Glücklicherwiis; im Schlafsack im Alkove vam Camper hiimelig iigmummelet, kööremer das i de Nacht mehrfach va Wittum.

Jitz giites vam Cape Race retour, bis uf Brigus, wammer ufum Crow‘s Head Campingplatz ubernachte. Am nächschte Taag gangemer „The Brigus Tunnel“ ga gugge, wa im Summer 1860 vam John Hoskins füre Captain Abraham Bartlett buuta cho isch; dä Captain het a iifachera Zuegang zu sim Schüff, wa vüü Tüüfgang ghääbe het u wäge dessi uf de anderi Sitta vam Föüse glääge isch, gwünscht. De John Hoskins het das innerhaub va vierne Maanet härepraacht, idäm är manuell Löcher i Stii bohret u dermit Sprengige, exklusiv mit Schwarzpuuver, vorgno het.

I de Nööchi va Cupids gseh mehr de a massiva Iischbärg...

...u chüü z Brownsdale ummi diräkt am Meer ubernachte.

Üsserscht liebevou chumeni hütt gweckti u fühle mi wunderbar; für ali, wa das no vor sich hii: As tuet im Fau nid weh, 50 z cho😎.

Uber Heart’s Content u Heart’s Desire fahremer uf Heart‘s Delight (di Ortsnäme hie züge o va de Härzlichkiit u inneri Iistölig va de Mensche, wa hie gwohnt hii u wohne) u gange dettena d Cable Station Provincial Historic Site ga gugge. Das isch bi üüs dahiim sowitt i wiis nid so bekannt; Nüfundland het i de Chronik va de Wäütgschücht ganz wichtigi Role gspüüt; einersitts hettes mittum Flughafe z Gander d Fluuggschücht zwüsche Europa u Nordamerika präägt, de erscht Funkspruch, wa va Cornwall a de englischi Küschta uus gsendet cho isch, ufum Signal Hill in St. John‘s empfange, z Notruefsignau va de Titanic in Cape Race va aune us erschts köört u z erschta transatlantischa Telefonkabu isch mittum Schüff „The great Eastern“, amene Sächsmaschter (!), va Valencia in Irland bis hie nach Heart’s Delight verliit cho (ufum de Foto gseht mu, wi das Kabu usum Bode chunnt u i z Huus ichi gfüert cho isch).

De Taag dedüür hettes gräänet; wäge dessi simmer wiitersch bis uf Argentia gfahre, wammer ufum Campingplatz übernachte. Eppa am 19:40h isch de no d Sune füracho. Hie hani Netz (d Lösig per Holafly funktioniert hie z Nüfundland leider nid sehr guet oder wier si ifach a z abgläägene Orte underwägs) u uberchume a Huufe Geburtstagswünsch wa öich💖. Merci nomau vüümau❤️!

Wättertechnisch verwütsche mer hütt schlicht a Bumbetaag, gange zersch ufe Castle Hill d Ussicht uf Placentia ga gniesse...

...u fahre nai wittersch bis a südlichscht Zipfu vam lingge Arm va de Avalon Peninsula, zur Cape St. Mary’s Ecological Reserve, amene Highlight uf üseri Riis. Wier luufe dettena eppa a Kilometer usi, füre Bird Rock ga z gugge - a risiga, fasch senkrächta Föüse am Rand va de Klippe, abgsetzt u i unmittubarer Riichwitti vam Feschtland, va 70‘000 Vogle, notabene Basstöple (Gannets) bewohnt.

Das si ungloublich schööni, imposanti Tier - u no sympathischer, wüw si mier o a we a Dahiim erinnere („as Gannet Bier“ 😃). Gspass apartig; o wemu, wi wier o, ornitologisch schüsch nid überdurchschnittlich interessiert isch, nümmtes iim hie de Ermu ichi; däne majestätische Vogle bim Flüüge u Näschte zuezgugge isch beiidruckend, berüerend u erfüllend. A Newfi, wammer hie träffe, siit üüs de o, är gsegi a Huufe Lütt us aune mügliche Länder hie härecho u mittemene Lächle im Gsicht ummi gah. D Gschmacks- u d Gsangskulisse si übrigens nid störend (villicht hiimer allerdings o günschtigi Wind- u Temperaturverhäütnis verwütscht).

Nume, we Gfahr im Aazuug isch, zum Bispüü dürna Adler, wa verbiiflüggt, nümmt de Lärm schlagartig zue u würd zum Gekreische.

Wier verbringe guet zwoahaub Stunn mit Stuune u Fotele u ubernachte ufum Parkplatz, ummi näbum hiesige Lüchtturm.