New Brunswick - a versteckti Perla...

Us Dank für z Refugium wülletum Hurrican Lee hiimer Walmart natürlich de o eppis z vurdiene gäh😊. Am 16. am Abe, wa nis d Tili nachmene ganze Taag im Camper ine a we „ufe Grinn kiit isch“, simmer i z Mäc vam Walmart-Komplex „uswärts ga Znacht ässe“ u hindernah no i Walmart a we ga shoppe. (O am 17. hani mu no a chiina Bsuech abgstattet, wüw d Uuge am 16. Sache erspät hii, wani a Nacht druber han müesse schlaafe, bevor i gwüsst han, dasi effektiv zum Chuuf wott schritte😅). Am 17. am Morge simmer bi wunderbarum Suneschinn erwachet u hii nis de sehr gfröit, jitz chene witterschzfahre. D Schääde si zwar sichtbar gsi (überau si a we Bletter u chlinneri Äscht glääge, vereinzelt si o Büüm entwurzleti cho, Strasse gsperrti gsi u offebar isch de Strom bü etliche Hüüser für as paar Stunn usikiit, va däm hii wier im Camper aber nix mitbecho), hii sich aber glücklicherwiis i überschoubare Grenze ghaute. Statt diräkt ummi i südöschtlicher Richtig zrugg a d Küschta z fahre, hiimer teicht, we nis de Lee jitz scho uf Fredericton verschlage het u mer därum unerwartet wunderbari Sitte va New Brunswick keneglehrt hii, de wölemer jitz no grad wittersch nordwärts ufum River Valley Scenic Drive fahre. So simmer bis uf Hartland cho, wa di lengschti teckti Houzbrügg va de Wäüt stiit. Si isch am 04.07.1901 iigweiti u im 1922 teckti cho. New Brunswick isch rächt stouz uf sinner teckte Brügge; de Grund für z Tecke isch schlicht, dass si so vüü lenger, us unteckti, häbe.

In Grand Falls siimer am Saint John River entlang ga wandere. D Gägend hie isch wunderschön, d Lütt o hie ummi megafründlichi u ma chunnt ganz easy i z Gspräch mittne.

Hie hiimer entschidde, jitze z cheere u üsi ursprünglichi Reiseplanig ummi witterzverfouge. So simmer de in Saint Andrews by the sea, im Südweschte va New Brunswick, aacho.

Das Stedtli isch würklich a Perla.

 Wägum groose Underschiid zwüsche Ebbe u Fluet (uf Hochdütsch „Tidenhub“), wa hie bi sächs Meter betriit, chä d Bootleni amene mobile Stääg aagmachti, dass si nid plötzlich i de Luft heiche, beziehigswiis undergange, wüw si gfluetet chä. Hie d Aasicht bi Ebbe…

u hie bi Fluet…

As het hie o a Hufe cooli Läädeleni, wi The Crazy Moose of St. Andrews😅.

Z Wätter isch umwärfend schön u warm gsi - das het entsprächend Turscht gäh😉.

Wittersch simmer zur New River Beach; wammer in Grand Falls vorum Tourist-Office gsässe sin, wüw mer dettena Internet-Zuegang ghääbe hii, het nis de Dany, a Iihemischa, aagsproche u nis de Bsuech va däm Strand empfohle.

Druff achi simmer uf Saint John cho, de öüteschti Stadt in Nordamerika. Gemäss Reisefüerer bcheemimu, wemu de Name va där Stadt fautsch usspricht (u Saint John‘s siit, wi d Houptstadt va Newfoundland), sofort as „without S“ zur Antwort😅. Hie lege Chrüzfahrtschüff an. Z Hafeareau würd grad umbuut u wäge dessi gittes hie momentan as liebevou iigrichtets Container-Village.

D Saint Martins Sea Caves; o hie muess mu d Fluet guet im Uug bhaute, we mu nid plötzlich wott a z Ufer müesse schwüme, wüw z Wasser würklich beiidruckend ruuch ichatrückt chunnt; „tout bien considéré“ isch das ja allerdings o kis Wunder, we de Tidenhub äbe (momentan u hie) zirka sächs Meter i rund sächs Stunn betriit.

De Grüenstreife uf de Outobahn, wa d Fahrbahne trennt, isch glägentlich imens (we mu dä chennti pachte, de chennti mu dermit vermuetlich a Chueherde dedüürfuettere😅).

So simmer im Fundy National Park aacho, wa mu o wunderbar chan ga luufe.

Di rooti Houzbrügg va Point Wolfe im Fundy National Park, wa 1992 buuti cho isch. D Vorgänger-Houzbrügg va 1942 het mu wöle schütze u darum Föüse obezui wägggsprenngt; tummerwiis si dii infolgedesse uf besagti, ehemaligi Brügg kiit u hii si zerstört, sodass de a nüi het müesse buut cho…

Wüwnes so beiidruckend isch, hie as Foto vam Bsuech va de Herring Cove Beach im Fundy National Park bü Ebbe; vorna rächts luuft de Simon…

…u de gliich Strand bi Fluet.

Gemäss Info-Taafela betriit de Underschiid va Ebbe zu Fluet hie vier Etage.

De Strand bi Alma, momentan gseht mu z Meer fasch nümme…

Hie si d Schüff so aagmachti, dass si bi Ebbe schinnbar i de Luft heiche.

Spannend, wi sich d Situation i sächs Stunn veränderet.

Di grosse Jakobsmuschle chä gäär va de Rock Barnacles (Seepocke) u va Schnäggleni bevöükeret.

Squirrels si überau umewääg🤗.

Kanadagäns büm Zmorge😉.

Nach scho iidrückleche Ungerschiede zwüsche Ebbe u Fluet im Fundy National Park mache mr no Haut im Hopewell Rocks Provincial Park. Dert liegt d’Differänz zwüche Ebbe u Fluet im Normalfau bi 14 Meter (!), bi Vou- bzw. Läärmond sogar no höcher.

Das isch iidrücklech, z’gseh, wie das Wasser au 6h sövu stiegt u wieder sinkt. Zum sech’s besser chönne vorsteue: Bi Fluet fliesst soviu Wasser i die ganzi Bay of Fundy, wie während 1 Jahr u 9 Monet über d’Niagarafäu abstürzt. U das äbe i nume grad 6h!! Uf däm Zytraffer gseht mä’s no besser.

Natürlech spaziere o mir chli ufem «Meeresgrund» ume u gniesse die spezielle Asichte.

Nach dene tolle u iidrückleche Tage a dr Bay of Fundy vrlöh mr New Brunswick u fahre nach Nova Scotia übere.

Unwyt vo Halifax bsueche mr Peggys Cove. Dr äuä meistfotografiert Lüchtturm vo Canada. Naja, mir si de o nid ganz alleini. Dr Lüchtturm isch eis, aber ds Fischerdörfli isch sehr hübsch zum luege.

Vo dert us vrbringe mr üsi letschi Nacht im Camper. So nach vier Monet füehlt sech’s scho chli so a, aus wärer chli üse…😊Jedefaus heimer näbschtem Usfau vo dr Heizig im Juni pannefreii 15’000km mit däm Schnuckel gha u heine scho chli lieb gwunne!

So vrabschiede mr üs vo üsem Hüsli uf Redli u starte no i ne nöie Abschnitt vo üsere Reis dür Ostcanada