Rund um d’Haubinsle «la Gaspésie» - Natur pur in Québec

Nach paar Tag im Parc National de la Gaspésie (jaja, mir hei itz o glehrt, dass ä Provincial Park in Québec äbe nid so sondern «Parc National» heisst u nüt vo Provinz) fahre mr zrügg a Lorenz Strom u ostwärts uf dr Küstestrass wyter.

Ungerwägs gseh mr bi Ebbe öppe o mau Seehüng uf trochne Feuse rueihe😊.

Schroffi Feuswäng u dr Blick uf d’Fautig vo dene Höger präge ds Biud vo dere Landschaft…

…z.T. isch d’Strass praktisch i ds Meer useboue worde u wird dürne Damm vor Brandig u de Wäue gschützt.

Uf däm Abschnitt gseh mr o vieli, schön ungerhauteni Lüchttürm, wo dr eint oder anger scho ä Haut Wärt isch.

In Petite Vallée finge mr ä Campingplatz ufere Klippe mit Blick über ds Meer; u emene wunderschöne Aberot, wo schöns Wätter vrspricht.

Mir gseh am Morge no Wale vo Wytem u chöi bim Vorkafi sogar no de Gannets (Basstölpel) bim Fische zueluege – wow, da tuet eim d’Schultere scho nume vom Luege weh!

Über ds sogenannte «Septembre long weekend» (Labourday am 1. Mäntig im Septämber) isch äbe länger frei, das heisst, mir hei scho chli zum Vorus ä Platz reserviert. Mir bliebe paar Tag im Forillon National Park (momou, dasmau isches würklech eine😊). Dä het einiges zwüsche Meer, Küschte u bewaudete Höger z’biete u isch vor auem erhautenswärt wäg sine geologische Vrwärfige. Mir gniesses hie mit Wandere u em Meer nah Flaniere. U obwohl mr gäge 30C heiss hei, isch üs ds Meer zum Bade de glich no grad chli z’früsch… 

Dr Blick vom Mont-Saint-Alban übere zum Cap-Gaspé u em Lüchtturm vo Cap-des-Rosiers.

Cap-Bon-Ami

Ungerwägs gäge ds Cap-Gaspé.

Dert chöi mr wieder Seehüng zueluege – herrlech😊!

Usflug uf d’Haubinsle Penouille.

Momou, äs herbstelet zuenähmend! Sogar die erste Canada Gäns gseh mr, wo sech langsam für ihre Zug nach Süde vrsammle.

U zu üsem grosse Erstuune gseh mr am einte Abe sogar no fiins Nordliecht überem Nachthimmu. Das hätte mr sövu südlech würklech nid erwartet Afang Septämber!

Bi schönstem Wätter bsueche mr Percé.

U dert o dr (nachem Lüchtturm vo Peggys Cove agäblech ds zwöitmeist fotografierte Sujet vo Canada) Rocher Percé…

…wo am angere Tag doch scho chli dezänt im Näbu vrschwindet.

In Carlton sur Mer übernachte mr ufemne wunderbare Campground, diräkt ufere Landzunge, wo i ds Meer usegeit.

Bevor mr de d’Provinz Québec vrlöh, fahre mr no hurti zum Chateau Bahia. Dr Bsitzer, ä ehemalige Lehrer us New Brunswick, het scho immer imene Schloss wöue wohne. Auso heter si Job gchündet u buechstäblech im Waud agfange, unger dr Mithiuf vo sim Vater, äs Schloss z’boue. Drbii ischer inspiriert worde dür Schloss Neuschwanstein (ok, aues us Holz u doch äs Bitzeli chlyner, aber trotzdäm: Chapeau!). Äs gseht glich no iidrücklech us, wie das da i de Böim inne thront😊.

Mitem Übertritt vo Québec nach New Brunswick isch die rein französischi Beiflussig furt. Auerdings isch New Brunswick die einzigi würklech zwöisprachigi Provinz vo Canada (die angere si rein Änglisch oder äbe, wie Québec, Französisch). U grad i gwüsse Teile vo New Brunswick (z.B. a dr Ostküschte) si die sogenannte Acadiens ir Überzahl. Das si ehemals französischi Uswanderer, wo vo de Ängländer deportiert oder vrtriebe worde si. Drzue isch spannend, dass Frankriich wie o Ängland Teile vo Canada im 18. Jh. bsetzt hei. Nach jahrelange Chriege u drmit o Niederlage het Frankriich siner Asprüch a Canada im «Friede vo Utrecht» ändgültig a Ängland müesse abträtte u die dertigi Bevölkerig isch z.T. i die ehemaligi südlechi französischi Kolonie Louisiana oder äbe i Norde gflüchtet u het sech dert aus sogenannti Acadians niederglah. No hüt isch die Vrwurzelig dür d’Flagge vo de Acadians guet sichtbar (franzsösischi Flagge mit gäubem Stärn) u z.T. omnipresänt. Interessanterwiis geit aber grad in New Brunswick ds Zämeläbe zwüsche anglo- u frankophone Canadians ribigslos mitenang.

Ir Nöchi vo Caraquet bsueche mr de o ä Acadian Village u gseh Hüser usem 18. u. 19. Jh.

Mir fahre de use uf d’Acadian Peninsula u gniesse dert ä wunderbari Abestimmig.

U im Kouchibougouac National Park lehre mr einiges über d’Vegetation zwüsche Waud/Salzmarschland/Meer.

Dert erfahre mr de o vo umsichtige Mitcamper, dass sech dr Hurrican Lee uf Höchi vo de Bermudas zumene Hurrican vor Kategorie 4 ufegschaffet het (mit 185km/h Wind) u itz langsam aber bestimmt Richtig Maine/USA bzw. New Brunswick u Nova Scotia/Canada ufmacht u dert am Samschtig aus Tropesturm bzw. aus Sturmtief mit immer no chnusprige Winde u viu Räge (so ämu d’Prognose) uf Land wärdi träffe. Eigetlech hätte mr ja d’Bay of Fundy wöue bsueche, üs wird aber dütlech vo däm abgrate u mir entscheide üs, nid a d’Küste sondern für paar Tag imene Provincial Park im Landesinnere, ir Nöchi vo Fredericton, i Deckig z’gah, bis dr Sturm düre isch. Guet adänkt aber äs chunnt chli angers: dr Park wird vom Governement of New Brunswick nämlech «wegen Sturms geschlossen»… Problem gelöst; ämu für sie, für üs eher nid… Dä Sturm isch o dr Grund, warum das Update chli vrzögeret chunnt, da mir üsi Zyt u dr Internetzuegang grad angerwytig iigsetzt u gnutzt hei😊. Am Fritig erwache mr no bi schönstem Sunneschyn im Mactaquac Provincial Park. Dä isch praktisch läär u äs gseht scho fasch surreal us u mä cha sech gar nid vorsteue, dass 24h später hie ds Wätter söu spinne!

Was mr auerdings absolut positiv us däm Abstächer i ds Landesinnere mitnähme: Mir wäre süsch nid nach Fredericton gfahre, was mr itz aber gmacht hei. U genau i dene Tage louft hie ds Harvest Music Festival mit Musiker us dr haube Wäut u viele Lüt, wo äxtra vo Wyt här i ds schier unbekannte Fredericton pilgere. Mache mr natürlech o u schmeisse üs i ds Getümmel – u das übrigens bi rund 26C u schönstem Sunneschyn!

D’Bezeichnig «Foodtruck» het dr Name hie übrigens würklech vrdient😂!

D’Streetperformance us Nah und Fern isch super😊!

U itz hocke mr bi richtig heftigem Räge u z.T. starche Windböe ufem Parkplatz vomene nid unbekannte nordamerikanische Detailhändler. 1. si hie bekanntlech Camper zum Übernachte duldet, 2. si kener grosse Böim ir Nöchi u d’Gfahr vo Fluet isch 3. uf däm Parkplatz o nid riesig. So unlauschig, wie dä Platz viellech schiint, so guet passter im Momänt haut grad 😂.

U mir luege morn mau zum Huli us u checke, was aus no steit u i weli Richtig üsi Reis wytergeit ab hie…