St. John's - d'Houptstadt vo Newfoundland & Labrador

Da dr Näbu i scho fasch winterlechem Usmass überem Meer hanget, entscheide mir üs – Iischbärge hin oder här, mä gseht se ja de glich nid… - wyter Richtig St. John’s z’fahre. 

In Gander bsueche mr ds North Atlantic Aviation Museum; grad richtig, amene Tag, wie hüt! Ds Museum isch nüt Grosses, aber dr Ort u sini Gschicht scho erwähnenswärt. Gander het sit langem dr Status vom erste bzw. letschte Tankstop vor bzw. nachem Atlantik inne gha. Unter angerem het hie – Sanktione sei Dank – o dr Fidel Castro ufem Wäg vo Kuba nach Moskau ä Stop iigleit u het zum erste Mau Schnee gseh😊. 

No viu erwähnenswärter isch dr 11. Septämber 2001. Nach de Terroraschläg i de USA isch dr Luftrum über de USA u Canada füre Flugvrchehr gsperrt worde. In Gander (u das het 10'000 Iiwohner) si innert paar Minute 42 Passagiermaschine, wo vo Europa ufem Wäg nach Nordamerika gsi si, groundet worde u 6'700 Passagiere («the plane people») hei praktisch über Nacht müesse vrchöschtiget u vrsorget wärde. Turnhalle, Musee u sogar Chiuche si aus provisorischi Nachtlager iigrichtet worde. So het dä schrecklech Tag ir zivile Luftfahrt wenigstens ä härzerwärmendi Komponänte gha. 

Bi düstere u eher spätherbstleche Bedingige zieh mr wyter bis St. John’s, dr Houptstadt vo Newfoundland & Labrador. 

Zu auem Übu stiegt no üsi Heizig im Camper us. Die iiz’schaute isch zwar grundsätzlech nume öppis für Memme, aber naja, bi 9C dinne Zmörgele isch schliesslech o nid dr Inbegriff vo Summerferie😂. Auso muess ä Lösig häre, wo üs dr Jorge vo Fraserway bi Mobile Trailer fingt. Thanks Jorge!! 

In St. John’s het am 12. April 1980 dr Terry Fox si bekannt Marathon of Hope gstartet. Är het wäge Chnochechräbs ds rächte Bei müesse amputiere, isch mitere Beiprothese jede Tag fasch ä Marathon gsecklet u het uf däm Wäg wöue Canada dürquere. Das isch ihm leider nid vrgönnt gsi, är het nach 5’373km müesse abbräche u isch mit nume grad 22i gstorbe. Aber immerhin heter mit dere Aktion so viu Ufmerksamkeit gwunne, dasser pro Iiwohner 1$ het chönne sammle, was denn scho 24.7 Mio $ zämebracht het für d’Chräbsforschig. 

In St. John's si o vieli Schiff stationiert, wo Offshore-Ölplattforme ungerhaute / beliefere etc.

Am 3. Tag in St. John’s isch üs de ds Wätter wieder besser gsunne. Mir erwache bi Sunne, im Hafe zieht zwar geng chli Näbu ine...

...aber äs isch wunderbar, die viele farbige Hüser bi Sunneschyn chönne z’bestuune! 

Ds vrmuetlech äutischte Huus vo ganz Newfoundland (1804).

Sogar d’Briefchäschte si i däm Look…

Itz hoffe mr, dass d’Wätterprognose nid ganz zuetrifft (schiins chömm’s wieder chli cho rägne…) u mir ufem Wäg südwärts i d’Avalon Peninsula chli gueti Ussicht heige… U süsch heimer immerhin wieder ä gängigi Heizig 😜