Vor Ville de Québec bis i Parc national de la Gaspésie

Ja, äs isch nid schlächt gsi, dass mr üs zersch chli süferli a d’Mönschemängi häretüüselet hei a dr Côte-Nord. Mir vrlöh Tadoussac mit viele wunderschöne Erinnerige.

D’Landschaft änderet, äs het hübschi Hüser mit viele Blueme u schöne Gärte u äs wird zuenähmend Landwirtschaft betriebe.

Churz vor dr Ville de Québec häbe mr quasi im letschte Momänt nomau ab u fahre uf d’Île d’Orleans.

Dert gö mr d’Michèle ga bsueche. Mir hei sie i dr Nicky’s Nose Cove uf Newfoundland (dr regumässig Läser merkt: dert, wo mr z.B. dr Tony troffe hei u wo d’Caplin a ds Ufer gspült si worde) lehre kenne u sie het üs denn spontan ihri Koordinate gäh u gmeint, mir dörfi gärn zu ihre cho u chönni uf ihrem Parkplätzli vor dr Garage übernachte. D’Gschicht isch ja fasch piinlech (aber itz hei mr agfange😂): Sie schriebt üs, mir söui bis zum Huus #150 fahre, vis-à-vis sigi d’Garage u ihre Campervan, mir chönni dert parkiere. Evtl. sigi sie de no mitem Velo ungerwägs… Aues klar (vrmeintlech)! Mir finge’s uf Ahieb, steue üses Camperli uf dä Vorplatz…

…u gö nähr mau gäge ds Huus übere. Dert erklärt üs dr Maa usem #150, «jaja, d’Michèle wohnt da äne» (u zeigt eidütig uf d’Garage übere). "?!?" Bon, mir nähme mau üser Campingstüehl use, nähme äs Apéro u male üs die schönste Gschichte us: Sie wohnt ir Garage u das vis-à-vis isch viellech ihre Ex-Maa gsi..? Sie wohnt im Campervan, isch meh uf Reise u nume churz daheime…? Shit, i was ine si mr da gschlittlet..? Gli druf fahrt d’Michèle zuche u aus klärt sech: Sie wohnt natürlech im Huus ungerdranne, im #156 u het üs eifach ds 150 gseit, damit mr nid z’wyt fahre, wüu mr ja äbe dobe söue parkiere 😂!

Mir hei ihre de üser Gedanke o vrzeut u zäme veiechli glachet! Am Abe mache mr äs Potluck (jede wo chunnt, stüüret öppis zum Ässe / Trinke bii) u schnure veiechli lang. Mir überchöme o no Bsuech vom Nouc, emene 11jährige Bärner Senn. Luschtig isch ja, dass sini Bsitzerin, d’Suzanne, no nie dr Link gmacht het nach Bärn… U sie isch hin und wäg, wo sie merkt, dass mir zwe die gliche Wurzle hei😊.

Vor Michèle us fahre mr de o i d’Stadt Québec, em Houptort vor glichnamige Provinz.

Obwohl ä Grossstadt, würkt sie uf üs rächt übersichtlech. Klar, mir dümple ir Unger- u ir Autstadt ume. Mir si zwar umgäh vo viele Touriste, die Stadt ma die au aber irgendwie guet schlücke u äs isch aghnähm, hie ungerwägs z’si. Spannend isch vor auem, dass hie die französischi Kultur u Chuchi vrbreitet isch. So git’s lecker Baguette, feine Chäs, guete Wyy. Einiges, wo sech ziemlech vom räschtleche Canada abhäbt, wo haut nordamerikanischi Züg het. 

*****

Wier verbringe schlussendlich zwü-a-haub Taage i de Stadt Québec, wa nis würklich sehr gfaut. Hie as paar Highlights druss usi: Kunschtvou gstauteti Outobahn-Stüppere bü de Aafahrt.

D Flagga va de Provinz Québec…

…u z Emblem va de Stadt Québec:

Ussicht uf d Autstadt vam Bassin Louise im Quartier Vieux-Port uus:

La Gare du Palais:

Kunscht isch in Québec augägewärtig:

Sight-seeing-Tour by bus😃:

D Avenue Cartier im Quartier Montcalm:

Z Château Frontenac / Hotel Fairmont u z Quartier Le Vieux-Québec:

Le Diamant et Le Capitole:

Les muses („die Musen“, dargstöüt si Musig, Eloquenz, Poesie, Architektur, Büüdhauerii (u Tourismus😃) u Malerii):

La Fontaine de Tourny:

Ussicht ufe St.-Lorenz-Strom; im Hindergrunn rächts isch d Ile d‘Orléans, wa d Michèle wohnt:

Z Musée du Fort…

…u as paar Impressione va de Autstadt:

Im Quartier Petit-Champlain:

D Polizii isch hie stylisch underwägs:

Im Summer isch a de Dsiischtige jewils as wunderbars Fürwärch z gniesse:

Ufum „Hiimwääg“ zu üsum Camper:

Zmoonerisch hiimer d Stadt Québec verlah u si bis uf L‘Islet sur mer gfahre, wammer a wunderbara Campingplatz diräkt am St.-Lorenz-Strom gfune u iina va de legendäre Suneundergäng vam Süüdufer vam St.-Lorenz-Strom gnosse hii.

Ufum Wääg uf St.-Fabien simmer uf „Au Petit Fribourg“ gstosse🤗.

In Sainte Flavie het de Marcel Gagnon as wunderbars Centre d‘Art gschaffe; uber 80 va sine Figure luufe usum Meer a z Lann.

De Windpark La Nordais bi Cap-Chat umfasst di ungloublichi Aazau va 133 Windreder.

*****

In Sainte Anne des Monts vrlöh mr für paar Tag d’Küste vom Lorenz Strom u fahre i d’»Bärge», i Parc national de la Gaspésie.

Hie hei mr vor paar Tag ä Campingplatz reserviert, im Momänt isch no die letschti Schuelferiewuchä, drum si die Plätz begehrt. Mir hei de ds Glück, dass am Tag nach üsere Akunft hie ä perfekte Wandertag isch, eifach nume sunnig. Auso nütze mr das us u starte zur Wanderig ufe Mont Albert. Dr Wäg obsi zieht sech dür Loub- u Nadelwaud, churz ungerem Gipfu erreiche mr d’Waudgränze u d’Landschaft wird chli tundraähnlech. Hie isch o die südlechsti Caribou-Herde ungerwägs, die hei mr aber leider nid z’gseh übercho.

Dr Mont Albert isch mit 1’088m eine vo de höchere Höger hie, entsprächend isch o d’Ussicht bi däm Wätter eifach nume herrlech! U da mir uf 200m starte, muesses de glich o zersch erwanderet si😊. Düre Park zieh sech les Monts Chic-Chocs, wo ä Teil vo de Appalache si, ä Teil vo üsere Wanderig absolviere mr de o ufem berüehmte International Appalachian Trail. 

Langsam zeigt sech o dr Herbst vo sire geng wie farbigere Site.

Ds dürab geit’s de dür d’Cuve du Diable u zieht sech veiechli lang über grossi Chempe u o mau dür nes Bächli düre…

Jedefaus bruche mr chli Erholig u mache üs chli ä ruehigere Tag. U.a. gniesse mr d’Ussicht vom Mont Ernest-Laforce us, zrügg uf üsi gestrigi Wanderig ufe Mont Albert.

U am Abe lö mr üs de bimene feine Znacht i dr Gîte du Mont-Albert la vrwöhne😋.

Nachemne chli vrrägnete (drmit aber perfekte «Update-») Tag vrlöh mr dr Parc national de la Gaspésie de wieder zrügg a d’Küste u mache üs ufe Wäg, die Haubinsle vor Gaspésie vouständig z’umrunde…